إعترافات طفولية
March 13, 2013
No comments
و أنا صغير كنت محتار جدا إزاي فى مسلسل البخيل و أنا فريد شوقي طالع في نفس الكادر مرتين (توأم في شخصيات المسلسل)
تفسيرى الأول كان ان فريد شوقي ليه أخ توأم بيمثل معاه.
ثم إكتشفت سذاجتي و أقنعت نفسي إن الأوقع إنهم جايبين مرايه و حاطينها قدامه… بس برضه نظرية المرآه تحطمت لما لاحظت أن فريد لابس هدوم مختلفة في الشخصيتين.
لحد ما عقلي الصغير إتعرف على فكرة المونتاج و ربط بينه و بين الظهور المزدوج لفريد شوقي في المسلسل… تخيلي للمونتاج كان إنهم بيصوروا المشهد مرتين و بعدين ييجي راجل يقص صورة فريد من الفيلم و يلزقها بالسوليتيب علي المشهد الأول زي القص و اللصق بتاع حصة الرسم كده.
