في أصول الكلمات – عن البضان
November 19, 2011
No comments
Browsing Posts tagged أصل الكلام
في أصول الكلام – قنطرة اللي كفر
November 19, 2011
1 comment
في مكان في القاهرة على النيل اسمه “قنطرة اللي كفر” أصل التسمية جه من أيام الحملة الفرنسية, حفروا 3 قناطر على النيل, الراجل اللي كان مهندس القنطرة دي كان اسمه “Cavarelli” وتم تسمية القنطرة على اسمه.
لما جم يحطوا يافطة بالعربي, كتبوا اسمه كده: كفرللي
جه واحد ذكي بعد كده, قال مفيش حاجة اسمها كفرللي, الراجل اللي بنى القنطرة دي كان خواجة, وأكيد كان كافر, يبقى المفروض تتسمى الذي كفر.
ومن ساعتها القنطرة اسمها قنطرة اللي كفر
في أصول الكلام
October 2, 2011
No comments
قعدت قريت كتاب “قاموس العادات والتقاليد والتعابير المصرية” اللي كاتبه أحمد أمين (1886 – 1954) ولقيت فيه حاجات لا تقدر بمال.
مثلا, أنا كنت كاتب عن أصل مقولة “مصر أم الدنيا” من سنتين تلاتة وناس كتير شتمتني… أنا للأسف ماكانش عندي مصدر ساعتها, كانت مجرد معلومة عارفها.
من الكتاب, صفحة 17:
وعامة المصريين يعتقدون ان القاهرة أحسن البلد ذوقا, فكما أنها “أم الدنيا” فكذلك هي أم الذوق.
ومن أقوالهم المأثورة “الذوق لم يخرج من مصر” ومصر في قولهم هذا يعنون به القاهرة لا القطر المصري بأجمعه.
ويروون في هذا قصه طريفة, ان رجلا اسمه حسن الذوق, كان في منتهى الظرف والكياسة واللباقة, رقيق الحس والشعور, فغاضبه قوم من المصريين فعزم على الخروج من مصر, فلما وصل إلى باب الفتح وهو أحد أبواب القاهرة, مات هناك. ومازال قبره في هذا المكان ويعرف ضريحه بسيدي الذوق. ومن اجل هذا قالوا الذوق لم يخرج عن مصر.
عشان الناس تصدق إن المقولة دي ملهاش علاقة بالحضارة وكده, ده مجرد سوء تفاهم 
ميزانين إتنين
June 2, 2011
1 comment
يا باشا الشقة شرحة وبرحة, دي فيها ميزانين!
طول عمري باسمع عن الميزانين وأعرف إنها الحتة العليا في محل أو شقة بيستعملوها للتخزين غالبا.
وطول عمري برده كنت فاكر إن اسمها ميزانين عشان حتة عليا وحتة واطية زي كفة الميزان, بس بصراحة عمري ما سألت نفسي اشمعنى ميزانين مش ميزان واحد؟
بعدين اكتشفت الحقيقة المرة, ميزانين أصلها فرنساوي Mezzanine, اللي أصلا جاية من الايطالي Mezzanino اللي بدوره جاي من اللاتيني Medianus أي المتوسط
أصل الجركن
June 2, 2011
1 comment
الجركن (بتعطيش الجيم) هو عبارة عن عبوه مصنوعة من البلاستيك بنحط فيها مية (مياه يعني) وأحيانا بنجيب فيها عصير من عند فرغلي.
الجركن برده بنجيب فيه زيت للعربية أو نحط فيه بنزين.
اكتشاف مهم: الجركن أصلا اسمه Jerry Can
وجيري ده مش اسم اللي اخترعه, بيقولك جيري ده اسم الدلع اللي كانوا مطلعينه على الألمان في الحرب العالمية. عشان هما اللي أصلا اخترعوا الجركن ده عشان يشيلوا فيه بنزين للعربيات.
من على ويكيبيديا http://en.wikipedia.org/wiki/Jerrycan
